Տարոն Մարգարյանը կատարեց իր քաղաքացիական պարտքը

Ավանի 1/17 ընտրատեղամասում իր քաղաքացիական պարտքն է կատարել Երեւանի գործող քաղաքապետ, ՀՀԿ ցուցակը գլխավորող Տարոն Մարգարյանը:

Լրագրողների դիտարկմանը, որ ցնդող կնիքների եւ կաշառքների մասին ահազանգեր կան, Մարգարյանը հայտարարեց, որ իրենք նույնպես դատապարտում են նման դեպքերը, եւ եթե նման փաստեր կան, պետք է դիմել իրավապահ մարմիններին, սակայն իրենք ընտրակաշառքների մասին լուրեր չունեն:

Հարցին, թե ինչո՞վ է զբաղված լինելու օրվա ընթացքում, նա պատասխանեց, որ ընտանիքի հետ է, իսկ հետո` ընթացքը ցույց կտա:

Yerkir.am-ի հարցին ի պատասխան, թե մտավախություն չունի՞,  որ չի կարող հավաքել 50+1 տոկոս ձայն, որի դեպքում հնարավոր կոալիցիա կկազմվի իշխանական ուժերի միջեւ, Տարոն Մարգարյանը հայտարարեց` երբ ցանկացած ուժ մասնակցում է ընտրություններին, վստահ է, որ հաղթանակն իրենն է լինելու:

Տարոն Մարգարյանը խուսափեց պատասխանել իր ունեցվածքի մասին հարցերին: