Գրքի վիրտուալ տոնավաճառ

Երեք շաբաթ է, ինչ գործում է yeritasardakan.com կայքը, որի միջոցով ցանկացած մարդ կարող է գրքի վաճառքի հայտարարություն թողնել:

Yerkir.am-ի հետ զրույցում կայքի հիմնադիր-համահեղինակ Լեւոն Մանուկյանը նշեց, որ կայքը ստեղծվել է Աբովյան-Իսահակյան փողոցների խաչմերուկում գտնվող գետնանցումի գրավաճառներին օժանդակելու համար:

«Մենք կապվել ենք նրանց հետ, սովորեցրել, թե ինչպես են կայքում գրանցվում, գրքի վաճառքի հայտարարությունը մուտքագրում: Արդեն շուրջ 750-800 անուն գիրք է վաճառքի ներկայացված: Մենք ցանկանում էին վիրտուալ տոնավաճառ ստեղծել: Մեր նպատակն է խթանել գրքի վաճառքի մշակույթի հաստատմանը եւ ընթերցողների թվի ավելացմանը»,- ասաց Մանուկյանը:

Ըստ նրա` կայքի հիմնադիրները, սեփական նախաձեռնությամբ, այսկերպ նաեւ Երեւանը Գրքի համաշխարհային մայրաքաղաքին են փորձել իրենց մասնակցությունը ցուցաբերել:

Ի դեպ, կայքում գրանցվելն անվճար է, եւ կայքը շահույթ չի հետապնդում: