Լատվիայում նշել են Նելսոն Ստեփանյանի 100-ամյակը

Լատվիայի հայ համայնքը մեծ շուքով նշել է ԽՍՀՄ  կրկնակի հերոս, ռազմական օդաչու Նելսոն Ստեփանյանի 100-ամյակը, ով զոհվել է բալթյան այս հանրապետության օդային տարածքում 1944թ դեկտեմբերի 14-ին: Հանդիսությունը կազմակերպել էին գրող, պատմաբան Յուրի Մելքոնովը և «Արարատ» թերթի հրատարակիչ ու խմբագիր Ալեքսանդր Գերոնյանը. տեղեկացնում է Սփյուռքի նախարարության մամուլի եւ հասարակյնության հետ կապերի վարչությունը:

Մոսկվայի տանը տեղի է ունեցել Նելսոն Ստեփանյանին նվիրված համաժողով: Երեք օր անց հայկական համայնքի ակտիվիստների և պատերազմի վետերանների մի մեծ խումբ ուղևորվել է դեպի Լիեպայա նավահանգստային քաղաքը, որտեղ թաղված են հերոսի մասունքները: Զինվորական գերեզմանոցում նրանց են միացել Ռուսաստանի գլխավոր հյուպատոսության աշխատակիցներ, Լիեպայայում ռուսական համայնքի ներկայացուցիչներ և քաղաքացիներ: Ծաղիկներ և ծաղկեպսակներ են դրվել Նելսոն Ստեփանյանի գերեզմանին:

Ելույթ ունեցողները նշել են, որ Լեռնային Ղարաբաղը շատ հերոսներ է տվել այդ պատերազմին և նրանց մեջ առանձնահատուկ տեղ է գրավում Նելսոն Ստեփանյանը:

Խորհրդային տարիներին Լիեպայայում կանգնեցված է եղել հերոսի հուշարձանը, որը ԽՍՀՄ փլուզումից հետո ապամոնտաժվել և տեղափոխվել է Կալինինգրադ:

100-ամյակի հանդիսությանը նվիրված տեսանյութը ցուցադրվել է Բալթյան Առաջին հեռուստաալիքով: