ԲՀԿ ցուցակի 42-րդ հորիզոնականում Ռոբերտ Քոչարյանի եղբոր դուստրն է

Ըստ «Ժողովուրդ»-ի տեղեկությունների` Երևանի ավագանու ընտրություններին մասնակցող ՀՀԿ-ն, ԲՀԿ-ն և ՕԵԿ-ն իրենց համամասնական ցուցակներում ընդգրկված թեկնածուներից պահանջել են միանգամից երկու դիմում գրել` մեկն առաջադրվելու, մյուսը հրաժարականի մասին:

Այդպիսով, գրում է թերթը, առաջնային տեղերում հայտնված հանրային հեղինակություն ունեցող որոշ գործիչների օգտագործելու են որպես ցուցակի «զարդարանք», սակայն ընտրություններից հետո գզրոցներից հանելու են նրանց երկրորդ դիմումներ և որոշակի փոխհատուցման դիմաց առաջարկելու են ինքնաբացարկ հայտնել:

Ի դեպ, գրում է «Ժողովուրդը», այս գործելաոճը նորություն չէ, այն բազմիցս կիրառվել է խորհրդարանական ընտրությունների ընթացքում: Թերթը հիշեցնում է, որ ամենավերջին օրինակը ՀՀԿ համամասնական ցուցակի 110-րդ տեղում հայտնված Հովհաննես Սահակյանն է, որը բազում ինքնաբացարկների արդյունքում հայտնվեց ԱԺ-ում:

Վերջում թերթը նշում է, որ ԲՀԿ ցուցակի 42-րդ` ոչ խոստումնալից հորիզոնականում ներկայացված է ՀՀ երկրորդ նախագահ Ռոբերտ Քոչարյանի եղբոր դուստրը` Իրինա Քոչարյանը: Ու չի բացառվում, որ նա ևս մանդատ ստանա: