Անիմաստ է ընդդիմությանը որեւէ պաշտոն առաջարկել. Նիկոլ Փաշինյան

Րաֆֆի Հովհաննիսյանի հացադուլն արդեն հայտարարված է, ուստի ԱԺ ՀԱԿ խմբակցության պատգամավոր Նիկոլ Փաշինյանն Ազատության հրապարակում լրագրողների հետ զրույցում կոռեկտ չհամարեց մեկնաբանել այդ քայլը:

Փաշինյանը վստահ է, որ ապրիլի 9-ին երդման արարողություն կլինի, իսկ թե ով կլինի երդում տվողը, չասաց:

Yerkir.am-ի դիտարկմանը` կարծես, իշխանությունները պատրաստ են ընդդիմությանը մի քանի պաշտոններ տալ, նա արձագանքեց. «Ընդդիմությանն անիմաստ է որեւէ պաշտոն առաջարկել, որովհետեւ ընդդիմությանը պաշտոն կարող է առաջարկել ՀՀ ընտրված նախագահը, իսկ ապօրինի իշխանությունը չի կարող որեւէ մեկին պաշտոն առաջարկել»:

Փաշինյանը հայտարարեց, որ իրեն շատ քիչ է հետաքրքրում, թե ինչ կանեն իշխանությունները, կարեւորն այն է, թե ինչ կանի ժողովուրդը: Մեր դիտարկմանն ի պատասխան, թե հնարավո՞ր է` ապրիլի 9-ից հետո ժողովուրդն անկառավարելի դառնա, Փաշինյանը նշեց, որ բռնությունները պետք է բացառվեն: «Ցանկացած կողմ, որ կդիմի բռնության, կպարտվի, ես կարող եմ ասել, որ ժողովուրդը բռնության չի դիմել երբեք եւ չի դիմի»,- հայտարարեց նա:

Ի դեպ, ՀԱԿ պատգամավորը հրաժարվեց պատասխանել Երեւանի ավագանու ընտրություններին վերաբերող հարցերին` հայտարարելով, որ քննարկումները շարունակվում են, վերջնական որոշումներ չկան: