15 հազար մարդ զոհվեց, որ Արցախը կոչվի ''Ադրբեջանի հեռավոր շրջա՞ն''

«Արցախ» հայրենակցական միություն» ՀԿ-ի նախագահ, ԱԺ պատգամավոր Համլետ Հարությունյանն այսօր լրագրողների հետ ասուլիս էր հրավիրել` իր վրդովմունքը հայտնելու նախորդ օրը Ազատության հրապարակում Ռուբեն Հախվերդյանի կողմից հնչեցված արտահայտության վերաբերյալ:

Ըստ Հարությունյանի` նման արտահայտություն իրեն թույլ տվողը գենետիկ անհայտ ծագման տեր մարդ է՝ անասնական ատելությամբ լցված արցախահայության նկատմամբ. «15 հազար մարդ զոհվեց, որպեսզի Հախվերդյանը Արցախը կոչի «Ադրբեջանի հեռավոր շրջա՞ն»:

Վերջին օրերին ադրբեջանական լոբբիի ակտիվությունը Հարությունյանը համարում է մեր քաղաքական ներկա իրավիճակից օգտվելու պատեհ առիթ:

«Որքան մեզ մոտ վայրիվերումները շատ լինեն, Ադրբեջանը այնքան ակտիվացնելու է իր դիվանագիտական ճնշումները և, անկասկած, հասնելու է հաջողության, եթե մենք միասնական չլինենք»,- ասաց նա:

Ինչ վերաբերում է ներքաղաքական իրավիճակին, Հարությունյանը դրա լուծումը տեսնում է կողմերի երկխոսության եւ ընդդիմության խելամիտ առաջարկների մեջ:

Ըստ նրա` նախագահն իր վարքագծով համաձայն է կառուցողական հարցեր քննարկել: «Երկխոսության առաջին ռաունդն անցել է անհաջող, հայ ժողովուրդը դեռ սպասում է, որ այդ երկխոսությունը ավարտվի հաջողությամբ»,- նշեց Հարությունյանը: