Մեր փողը ռուբլի չպետք է կոչվի. դրամը 20 տարեկան է

Հայկական դրամը 20 տարեկան է:

Այս կապակցությամբ Հարություն Հարությունյանը ֆեյսբուքյան իր էջում գրել է. «1990 թվականն էր: Մենք` այսպես ասած անկախականներս, հավաքվում էինք պոլիտեխնիկի լսարաններից մեկում: Հետաքրքիր օրեր էին: Քննարկում էինք, թե անկախ Հայաստանը ինչպիսին պետք է լինի:

Լուսահոգի Սեյրան Խաթլամաջյանի ամեն մի խոսք, միտք, առաջարկություն անտարբեր չէր անցնում: Թեման տալիս էր, քննարկումն սկսվում էր, իսկ վերջում ինքը իր կարծիքն էր ասում և «կնքում» ասածը:  Մի օր քննարկում էինք անկախ Հայաստանի արժույթի հարցը: Ես հարցրի` «ի՞նչ փող ենք ունենալու, ո՞նց է կոչվելու»: Հայկազուն Ալվրցյանը անմիջապես ասաց. «Դրամ, մեր փողը ռուբլի չպետք է կոչվի: Դրամը լավ բառ է և հայերեն է»:

Այդ օրը մեզանից ոչ ոք չէր կարող պատկերացնել, որ երեք տարի հետո Հայաստանի վճարման միջոցը Դրամն է լինելու: Թերևս Հայկազուն Ալվրցյանն ու Սեյրան Խաթլամաջյանը այդ հարցում վստահ էին: Ասելս էն ա, որ մեր դրամը արդեն դարձավ 20 տարեկան: Շնորհավոր....»: