Օջալանը զինադադարի կոչ կանի՞

Իմրալըի բանտում ցմահ ազատազրկված «Քրդական աշխատավորական կուսակցության» առաջնորդ Աբդուլահ Օջալանը հնարավոր է հանդես գա զինադադարի կոչով:

«Հյուրիեթի» հաղորդմամբ` որպես հնարավոր ճանապարհային քարտեզի մաս Օջալանը ոչ միայն ՔԲԿ-ի զինյալներին կոչ կանի դադարեցնել կրակը, այլ նրա անունից կուսակցությունը կհայտարարի, որ Թուրքիայում տեղակայված իր 4 հազար զինյալները դուրս են բերվում երկրից: 

Մինչ այդ, սակայն, Օջալանը դեռեւս պետք է ստանա իր երեք նամակների պատասխանները, որ հանձնել է «Խաղաղություն եւ ժողովրդավարություն» կուսակցության պատվիրակությանը: Պատվիրակությունն Իմրալը կղզի էր այցելել փետրվարի 23-ին: 

Նամակներն ուղղված են «Խաղաղություն եւ ժողովրդավարություն» կուսակցությանը, ՔԲԿ-ին, ինչպես նաեւ վերջինիս` Եվրոպայում գործող ճյուղերին եւ վերաբերում են խաղաղության ճանապարհային քարտեզին: Նամակներին պատասխանելու համար Օջալանը 10 օր ժամանակ է տվել: