Նոր մանրամասներ` "Դրախտ" հյուրանոցային համալիրում տեղի ունեցած միջադեպի վերաբերյալ

Ստեփանավանի բժշկական կենտրոնի դիահերձարանում դիակների դատաբժշկական փորձաքննությամբ պարզվել է, որ «Դրախտ» ռեստորանա-հյուրանոցային համալիրում փետրվարի 21-ին մահացածների վրա բռնության հետքեր չկան, և ըստ նախնական տեղեկությունների՝ մահվան պատճառը եղել է ածխածնի մոնօքսիդի թունավորումը, այսինքն՝ պատճառը եղել է գազի վառարանի ոչ ճիշտ օգտագործումը:

Ֆոտոլրագրող Գագիկ Շամշյանի հաղորդմամբ` նշված համալիրը պատկանում է Ստեփանավանի նախկին քաղաքապետ` Քոթո մականվամբ, Սարգիս Ղարաքեշիշյանին, ով տարիներ առաջ նույն ռեստորանա-հյուրանոցային համալիրում վիճաբանել էր մի խումբ անձանց հետ և իր մոտ եղած հրազենից կրակոցներ արձակել, ինչի հետևանքով եղել են վիրավորներ, և նախկինում էլ նշված օբյեկտում եղել են մահով ավարտված ողբերգական դեպքեր:

Ստեփանավանցիները ֆոտոլրագրողին պատմել են նաև, որ գազախողովակի կանոնների խախտման մասին տեղյակ է եղել Սարգիս Ղարաքեշիշյանը, ով արդեն փորձում է ինչ-որ մարդկանց միջոցով ազդել քննչական մարմնի վրա, որպեսզի ձերբակալված տնօրենը քննչական մարմնին չներկայացնի իրականությունը:

Այսօր ձերբակալվել է ռեստորանա-հյուրանոցային համալիրի տնօրեն Սամվել Թորոսյանը եւ տեղափոխվել ոստիկանության Տաշիրի բաժնի ձերբակալվածների ժամանակավոր պահման վայր: Փետրվարի 23-ին քննչական մարմինը դիմելու է Լոռու մարզի ընդհանուր իրավասության դատարան, որպեսզի Ս. Թորոսյանի նկատմամբ որպես խափանման միջոց ընտրվի երկամսյա կալանքը: