Վարդան Ղուկասյանի եղբորորդու վիճակը ծանր է. ՛՛Ժողովուրդ՛՛

Նախօրեին տեղի ունեցած ծեծկռտուքի պատճառով ծանր վնասվածքներով Գյումրու բժշկական կենտրոն է տեղափոխվել նախկին քաղաքապետ Վարդան Ղուկասյանի ավագ եղբոր՝ Գեւորգ Ղուկասյանի որդին՝ Նիկոլայը (Կոլիկ): Նա բժշկական օգնություն ստանալուց անմիջապես հետո դուրս է գրվել հիվանդանոցից:

Ըստ գյումրեցիների՝ ծեծկռտուքի պատճառը Վարդան Ղուկասյանի կրտսեր աղջիկն է, որին «հավանել է» Գյումրու «Ֆրիտյոֆ Նանսենի անվան մանկատուն» ՊՈԱԿ-ի տնօրենի որդին: Սակայն սա ամենեւին էլ դուր չի եկել աղջկա եղբայրներին:

Համաձայն այդ զրույցների՝ մանկատան տնօրենի՝ Անահիտ Կարապետյանի որդին ԲՀԿ-ական է, պատգամավոր Մարտուն Գրիգորյանի մտերիմը: Այս մասին գրում է «Ժողովուրդ» օրաթերթը, որի հետ զրույցում ՊՈԱԿ-ի տնօրեն Անահիտ Կարապետյանն ասել է. «Իմ տղան հեռու է նման բաներից: Նա ամբողջ օրն իմ կողքին է, աշխատում է: Սխալ են Ձեր տեղեկությունները: Ճիշտ է՝ նա ԲՀԿ-ական է, բայց ոչ մի կապ չունի ՀՀԿ-ականի հետ: Նա բացարձակ ամեն ինչից հեռու է: Եթե իմ տղան լիներ, ես մտահոգված կլինեի ու հաստատ Ձեզ այդ մասին կասեի»:

Կոլիկն էլ ոստիկանությանը ցուցմունք է տվել եւ ասել, որ իր գլխին սառույց է ընկել: