Արամ Հարությունյանն ասաց, թե ում պատվերն է կատարում

Գործող նախագահ, նախագահի ՀՀԿ-ական թեկնածու Սերժ Սարգսյանը երեկ Մովսես գյուղում մի տարեց մարդու հետ զրույցում հայտարարել էր. «Ես ե՞մ մեղավոր, որ քո էրեխեքը Ռուսաստանում են: Դրա համա՞ր էլ եմ ես մեղավոր, չթողնեիր՝ գնային»:

Այսօր լրագրողների հետ հանդիպման ժամանակ նախագահի թեկնածու Արամ Հարությունյանը, անդրադառնալով նախագահի այս խոսքերին, ընդգծեց. «Իհարկե, նախագահն է մեղավոր: Մարդը հինգ տարի նախագահ է եղել եւ չի պատկերացնում, որ ՀՀ բոլոր գյուղերում տղամարդկանց մեծ մասը գնացել են օտար, ամայի ճամփեքով»:

Նա նշեց, որ Նապոլեոնն իր կողքին խելացի մարդկանց էր պահում, եւ հռետորական հարց տվեց, թե ովքե՞ր են այսօր կանգնած նախագահի կողքին, ովքե՞ր են նրան խորհուրդներ տվողները: «Նախագահին պատիվ չի բերում վարունգի թեմայով բաներ ասելը»,-հայտարարեց Արամ Հարությունյանը եւ ապագա նախագահներին կոչ արեց, որ չմոռանան, որ իրենք մի օր նախագահ չեն լինի եւ ինչ որ գյուղում մի օր բանջարաբոստանային կուլտուրաների մշակմամբ են զբաղվելու:

Նախագահի թեկնածուն հայտարարարեց, որ չի ուզում, որ մեր երկրի նախագահը մի քանի հոգու նախագահը լինի: Ըստ Հարությունյանի` մեզ հարկավոր է ուժեղ նախագահ, ով ձեռքը կխփի սեղանին եւ վերջ կտա բոլոր արատավոր երեւույթներին: Նախագահի թեկնածուն վստահ է, որ այս ընտրությունները չեն կարող լինել օրինական, նաեւ հարցրեց, թե ո՞վ պետք է մասնակցի քվեարկությանը, երբ ՀՀ գյուղերն օր օրի դատարկվում են:

«Այս ընտրությունները մեզ տանելու են խորը դեպրեսիա»,- նշեց Արամ Հարությունյանն ու թեկնածուներին կոչ արեց լինել ազնիվ: Նա նաեւ հայտարարեց, որ սոցիոլոգներ ու քաղտեխնոլոգներ մեր երկրում չկան, մեր երկրում կան ծախված «սոցիոլոխներ» եւ քաղտեխնոլոգներ:

Ի դեպ, ասուլիսի ընթացքում եւս մեկ անգամ հնչեց հարցը, թե ո՞ւմ պատվերն է կատարում Արամ Հարությունյանը, որին ի պատասխան` բանախոսը հայտարարեց, որ ինքը կատարում է ՀՀ քաղաքացու պատվերը: