Նախընտրական կրակոցներ

ՀՀ նախագահի թեկնածու Անդրիաս Ղուկասյանն իր բախտակիցներին բաց նամակով կոչ է արել հանել իրենց թեկնածությունները եւ չմասնակցել առաջիկա ընտրական ֆարսին: Սակայն, ժամանակը, որ նա տվել է (մինչև հունվարի 15-ը), շատ կարճ է: Այդ ընթացքում թեկնածուներից ոմանք նույնիսկ իրենց շորերը չեն կարող հանել:

***

ՀՀ նախագահականից Անդրիաս Ղուկասյանի բաց նամակի պատասխանը չի ուշացել: Մամլո ծառայությունը տարածել է Սերժ Սարգսյանի բաց երկտողը հետևյալ բովանդակությամբ՝ ով իր թեկնածությունը հանի՝ մտքինս ա:

***

Սերժ Սարգսյանի նախընտրական կլիպն արդեն նկարահանվել է: Երգը կատարում են շատ հայտնի երգիչ-երգչուհիներ եւ մի կին պատգամավոր ԱԺ-ից: Ասում են՝ երգը շատ լավն է, բայց ո'չ խոսքերի հեղինակը, ո'չ էլ երաժշտության, առնվազն ԱԺ պատգամավոր կնոջը հայտնի չեն:

***

Մեր քաղաքական կյանքը հեռուստասերիալներում պատկերելու փորձեր նախկինում էլ են եղել: Եթե հիշում եք՝ «Վերվարածների» Ճըպլը հասել էր վստահված անձի կարգավիճակի: Նախագահական ընտրություններին ընդառաջ Հ1-ը կսկսի Սերժ Սարգսյանի հակառակորդներին նվիրված «Բախտակիցները» սերիալի ցուցադրությունը, իսկ «Շանթում» կմեկնարկի «Ընտրվիր, թե կարող ես» հեռուստածրագիրը:

Էդիկ Անդրեասյան