ԱՄՆ-ը մտադիր չէ ճանաչել Պաղեստին պետությունը

ԱՄՆ-ը մտադիր չէ ճանաչել Պաղեստինի ազգային վարչակազմը որպես Պաղեստին պետություն. ճեպազրույցում հայտարարել է ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդը:

«Մեր քաղաքականությանը համապատասխան` մենք անփոփոխ շարունակելու ենք այն կոչել Պաղեստինի վարչակազմ այնքան ժամանակ, քանի դեռ բանակցությունների ճանապարհով համաձայնություն ձեռք չի բերվել որոշակի սահմաններով պետության ստեղծման մասին»,- ասել է նա` մեկնաբանելով Պաղեստինի առաջնորդ Մահմուդ Աբասի` վերջերս ստորագրած հրամանը` Պաղեստինի ինքնավարությունը Պաղեստին պետություն կոչելու մասին:

Ըստ Նուլանդի` չի կարելի պետություն ստեղծել հռետորությամբ, անվանումներով ու պիտակներով. տեղեկացնում է Интерфакс-ը: