Վերջը՝ ափսոսանք հայտնեց

ԱԺ ՀՀԿ խմբակցության անդամ Մհեր Սեդրակյանը հաղորդագրություն է տարածել լրագրող Մհեր Արշակյանին օրերս ԱԺ-ում սպառնալու վերաբերյալ, որը ներկայացնում ենք ստորեւ.

«Ափսոսում եմ մի քանի օր առաջ Ազգային ժողովում իմ և Ա1+ հեռուստաընկերության լրագրողի միջև տեղի ունեցածի համար: Այո՛, հարգարժան լրագրողին հաջողվեց ինձ նյարդայնացնել, հետո ամենը խնամքով մոնտաժելով՝ աղավաղել իրողությունը: Բայց դա երեւի այլևս կարեւոր էլ չէ: Սա թերեւս հենց այն դեպքն է, երբ ե՛ւ լրագրողը, ե՛ւ պատգամավորը մեր ողջ հասարակությունից, մասնավորապես՝ բոլոր լրագրողներից ներողություն խնդրելու կարիք ունեն. մեկը՝ լրագրողական էթիկան խախտելու, մյուսը՝ պատգամավորական: Ես անկեղծորեն իմ ափսոսանքն եմ հայտնում նյարդային պահին հնչած խոսքերի համար»:

Հիշեցնենք, որ «Ա1+»-ի լրագրող Մհեր Արշակյանը փորձել էր ԱԺ միջանցքում հարց ուղղել պատգամավորին, վերջինս էլ, հարցն անգամ չլսելով, սպառնացել է. «Դավա՜յ, դավա՜յ, յալլա՜, կտամ ծնոտդ կպոկեմ»: