''Մատաղիսի գործով'' հանցագործներից մեկը Ջհանգիրյա՞նն է

Շիրակի մարզի ընդհանուր իրավասության դատարանում շարունակվել է Մատաղիսի գործի լսումը: Նիստի ժամանակ ելույթ է ունեցել նախ սպանված զինվորներից մեկի հայրը ու հայտարարել, թե 2 տղաների սպանությունը Մատաղիսում տեղի է ունեցել տարբեր ժամանակամիջոցներում եւ ոչ այն անձանց կողմից, ովքեր այսօր հայտնվել են մեղադրյալի աթոռին: Այնուհետեւ պաշտպանական ճառով հանդես է եկել մեղադրյալի աթոռին հայտնված երեք երիտասարդ տղաների՝ Մուսա Սերոբյանի, Ռազմիկ Սարգսյանի եւ Արայիկ Զալյանի փաստաբան Հայկ Ալումյանը. տեղեկացնում է Galatv-ն:

Իսկ մինչ դատական նիստի մեկնարկը, տեղի է ունեցել բողոքի ակցիա Շիրակի մարզի ընդհանուր իրավասության դատարանի շենքի դիմաց: Ակցիային մասնակցել են սպանությունների մեջ մեղադրվող զինվորների հարազատները, քաղաքացիական ակտիվիստներ Գյումրիից, Երեւանից եւ Վանաձորից: Ակցիայի մասնակիցները պահանջում էին դատարան հրավիրել ԱԺ պատգամավոր, նախկին զինդատախազ Գագիկ Ջհանգիրյանին:

«Իրան շուտ պտի հրավիրեին, ինքը ոչ թե մասնակցություն է ունեցել, այլ ակտի´վ մասնակցություն է ունեցել էս գործին, էս գործը Գագիկ Ջհանգիրյանի թեթեւ ձեռքով է խրբվել»,- դժգոհում էր Ջուլիետա Սարգսյանը՝ մեղադրյալ Ռազմիկ Սարգսյանի մայրը: «Ջհանգիրյանն էս  գործում գլուխգործոց է, ինքն է իրական հանցագործներին թաքցնողն եղել, եւ ինքն է էս գործը սարքել: Ես պահանջում եմ՝ Գագիկ Ջհանգիրյանին կանչել դատարան»,- ասել է Ջուլիետա Սարգսյանը: