''Մատաղիսի'' գործով վերաքննիչ բողոքի քննությունը նշանակված է մարտին

Մարտի 4-ին ՀՀ վերաքննիչ քրեական դատարանում` դատավոր Եվա Դարբինյանի նախագահությամբ, տեղի կունենա «Մատաղիսի» գործով արդարացման դատավճռի դեմ մեղադրական կողմի բողոքների քննությունը: Այս մասին տեղեկացանք datalex տեղեկատվական համակարգից:

Տուժող Ռոման Եղիազարյանի իրավահաջորդ Գոհար Մելքոնյանը միջնորդում է վերանայել Շիրակի մարզի ընդհանուր իրավասության դատարանի` անցյալ տարվա դեկտեմբերի 18-ի դատավճիռը և կայացնել ճիշտ վճիռ: Իսկ գործով դատավարական հսկողություն իրականացնող ՀՀ զինվորական դատախազությունը միջնորդում է բեկանել արդարացման դատավճիռը և կայացնել մեղադրական դատավճիռ:

Հիշեցնենք, որ Ռազմիկ Սարգսյանը, Մուսա Սերոբյանը և Արայիկ Զալյանը մեղադրվում էին 2003թ.-ին ծառայության ընթացքում Մատաղիս գյուղում իրենց ծառայակիցների սպանության մեջ: