Հայաստանում խանդի մթնոլորտ ձեւավորողը

Ռուսաստանի դերակատարությունը տարածաշրջանում, հատկապես` Ղարաբաղյան կարգավորման հարցում ԼՂՀ նախկին արտգործնախարար Արման Մելիքյանը լրագրողների հետ հանդիպման ժամանակ «հսկայական» որակեց: Նա նշեց, որ հայ-ռուսական հարաբերությունները միապաղաղ չեն զարգացել, եղել են վայրիվերումներ, եղել է նաեւ, որ պակասել է փոխադարձ վստահությունը:

Ըստ Մելիքյանի` պատահական չէ, որ նախընտրական փուլի նախաշեմին Հայաստանի բոլոր քաղաքական ուժերը փորձում են մերձեցնել իրենց կապերը Ռուսաստանի հետ: ԼՂՀ նախկին արտգործնախարարի հավաստիացմամբ` ՌԴ-ի վերաբերմունքից են կախված այս կամ այն քաղաքական ուժի կամ գործչի հնարավոր հաջողությունները ընտրական գործընթացների ժամանակ եւ հետո:

«Միայն իշխանության վրա հենվելով` Ռուսատանը չի կարող վստահ լինել, որ Հայաստանում կապահովի իր շահերի հետագա ներկայությունը, իր հանդեպ բարիադրացիական վերաբերմունքը»,- նշեց Մելիքյանը եւ հավելեց, որ Հայաստանն էլ, իր հերթին, մեկ ուզում է նստել Արեւմուտքի աթոռին, մեկ` Ռուսաստանի:

Նրա համոզմամբ` Ռուսաստանը փորձում է Հայաստանում խանդի մթնոլորտ ձեւավորել` այս կերպ գործակցելով տարբեր քաղաքական ուժերի հետ, ինչն էլ ներքին մրցակցության կհանգեցնի, «քանի որ Հայաստանում պատրանք կա, որ ով ավելի մոտ է կայսրին, նա ավելի լավ հեռանկարներ ունի»: