Ի՞նչ են նախագահականում քննարկել կոալիցիոն ուժերը

Խորհրդարանական ճեպազրույցների ընթացքում ԱԺ կոալիցիոն երկու կուսակցությունների` ՀՀԿ-ի եւ ԲՀԿ-ի ներկայացուցիչները հաստատեցին տեղեկություններն այն մասին, որ երկու օր առաջ նախագահականում կոալիցիոն ուժերի մասնակցությամբ հանդիպում է տեղի ունեցել:

Հանդիպմանը ներկա են եղել ԲՀԿ առաջնորդ Գագիկ Ծառուկյանը, ԱԺ նախագահ Հովիկ Աբրահամյանը եւ ՕԵԿ ղեկավար Արթուր Բաղդասարյանը:

ՀՀԿ խմբակցության ղեկավար Գալուստ Սահակյանը նշեց, որ նախագահականում ներկոալիցիոն հարաբերությունների մասին ոչինչ չի խոսվել. մի շարք օրինագծեր են քննարկվել: «Օրինակ` «Ընդերքի մասին» օրենքը»,- ասաց նա:

ԲՀԿ-ական պատգամավոր Նաիրա Զոհրաբյանը, սակայն, պնդեց, որ ընդերքի մասին օրինագիծը չի քննարկվել, իսկ Գալուստ Սահակյանը սխալվել է, քանի որ հանդիպմանը ներկա չի եղել: «Քննարկվել են բացառապես հարկային փաթեթի վերաբերյալ հարցեր: Կոալիցիոն գործընկերները յուրաքանչյուրը ներկայացրել է իր դիրքորոշումն այդ փաթեթի վերաբերյալ: Այլ հարցեր չեն քննարկվել»,- ասաց  պատգամավորը` նշելով, որ հանդիպմանը ԲՀԿ-ից ներկա են եղել Գագիկ Ծառուկյանն ու Վարդան Բոստանջյանը: