ԱՄՆ "վիրտուալ դեսպանատուն"` Իրանում

ԱՄՆ պետքարտուղար Հիլարի Քլինթոնը ֆարսիով հեռարձակվող երկու հեռուստաընկերությւնների տված հարցազրույցում ասել է, որ Իրանում ԱՄՆ "վիրտուալ դեսպանատուն" բացելու ծրագիր ունի. տեղեկացնում է mignews.com-ը:

«Մտադիր եմ ուղիղ խոսել Իրանի ժողովրդի հետ, հատկապես` երիտասարդների: Դուք պետք է հասկանաք, որ մենք վեճեր չունենք Իրանի ժողովրդի հետ»,- հայտարարել է նա:

Պետքարտուղարը հայտնել է, որ կայքը կսկսի գործել մինչեւ տարեվերջ: Այն կհիշեցնի դեսպանությունների սովորական կայքերը, սակայն նշումով, որ ԱՄՆ-ը եւ Իրանը դիվանագիտական հարաբերություններ չունեն: Կայքում տեղադրվելու են տարբեր նյութեր, բացատրություններ, թե ինչպես է կարելի ամերիկյան վիզա ստանալ, նաեւ ցուցումներ` ԱՄՆ-ում սովորելու ցանկություն ունեցողների համար: