"Լևանտեն" գերազանցում է "Ռեալին" և "Բարսային"

Իսպանիայի առաջնությունում գրանդների համար վիճակը չի շտկվում, փոխարենը նախկին հետնապահ «Լևանտեն» 9 խաղից հետո շարունակում է գլխավորել մրցաշարային աղյուսակը:  3:2 հաշվով «Լևանտեն» հաղթանակ տոնեց «Ռեալ Սոսյեդադի» նկատմամբ և այժմ 23 միավոր ունի իր ակտիվում: 

22 միավորով 2-րդ հորիզոնականում է Մադրիդի «Ռեալը», որը 3:0 հաշվով պարտության մատնեց  «Վիլյառեալին»:

Կատալոնական «Բարսելոնան» 21 միավորով եզրափակում է լավագույն եռյակը: Վերջին խաղում կապտանռագույնները 1:0 հաշվով հաղթանակ տարան «Գրանադայի» նկատմամբ:

Իսպանական Լա լիգայում սա հեղափոխություն է. այն ինչ անում է «Լևանտեն» դժվար է օրինաչափություն կոչել, ավելի շուտ պատահականություն է, և հակառակը համոզելու համար այս ակումբը ստիպված կլինի դեռ երկար մնալ առաջատարի դիրքում: Սակայն այս փաստը, թերևս, այնքան մտահոգիչ չէ, որքան այն, որ գործող չեմպիոն «Բարսելոնան» ոչ ոքի կամ էլ նվազագույն հաշվով է ավարտում իր հանդիպումները:

Ի տարբերություն կատալոնացիների մադրիդցիներն անակնկալներ չեն մատուցում և վերջին խաղերում խոշոր հաշվով հաղթանակներ են տոնում, սակայն սա էլ «Ռեալին» դուրս չի բերում առաջին հորիզոնական: «Լևանտեն» լուրջ մարտահրավեր է նետել, որը կոչ է անում նախկին առաջատարներին ավելի ուշադիր լինել և ճակատագրական սխալներ չանել: