Բարսելոնան տիտղոսների քանակով գերազանցեց Ռեալին

Կատալոնական «Բարսելոնան», նվաճելով Եվրոպայի սուպերգավաթը, տիտղոսների քանակով գերազանցեց իր հակառակորդ Մադրիդի «Ռեալին»։ Այժմ կապտանռագույններն ունեն 76 տիտղոս, իսկ արքայականները՝ 75:

Դեռևս ոչ մի թիմ չի կարողացել այսքան մոտ կանգնել արքայականի ռեկորդին, սակայն կատալոնացիները կարողացան նաև գերազանցել այն: Երիտասարդ մարզիչ Պեպ Գվարդիոլան երեք տարվա ընթացքում նվաճեց 12 տիտղոս: Անկասկած, սա լուրջ մարտահրավեր է ֆուտբոլային աշխարհին: Իսկ մադրիդցիների նոր սպառազինված կազմը թեժ և անզիջում պայքար է խոստանում 2011/12 մրցաշրջանում: 

«Ինչ վերաբերվում է մեր տիտղոսներին, կասեմ հետևյալը.  երեք տարում 15 հնարավորից՝ 12-ը  շատ է։ Դա ուղղակի անիրական է։ Այնուամենայնիվ, մենք պետք է ուժեղացնենք մեր խաղը։ Եթե ես այլ կարծիքի լինեի, ապա իմ փոխարեն ուրիշ մեկը կաշխատեր», - Գվարդիոլային մեջբերում է Marca-ն։