Գերմանական գույների աշխարհում

«Գյոթե» ինստիտուտը Թրոիզդորֆի նկարազարդ գրքի թանգարանի հետ համատեղ Երևանում հոկտեմբերի 5-28-ը ներկայացնում է  գերմանական մանկական պատկերազարդ 13 գրքի ցուցահանդես:

Գերմանական սրահի ղեկավար Ժաննա Գաբրիելյանի խոսքերով` ցուցահանդեսը հնարավորություն է ընձեռում հայ ընթերցողին ծանոթանալու գերմանացի գրողների ստեղծագործություններին:

«Ցուցահանդեսին, միջազգայնորեն ճանաչված դասականներից բացի, ներկայացված են երիտասարդ արվեստագետներ, որոնց ստեղծագործությունները խոսում են գերմանական պատկերազարդ գրքի վերջին միտումների մասին»,- ասաց նա` հավելելով, որ ցուցահանդեսի նպատակը դեպի մեծ աշխարհ երեխաների առջեւ կյանքի դռները բացելն է:

Ցուցահանդեսը համախմբել է ժամանակակից մանկական պատկերազարդ գրքարվեստի լայն սպեկտր` ջրաներկից և կոլաժից մինչև թվային փորձարկումներ: Երբեմն նկարչի տեսակետը միամիտ է, երբեմն` թերահավատ, բայց և ինտելեկտուալ:

Սրահի ղեկավարը նշեց, որ 13 մասնակից արվեստագետները հրավիրվել էին ընտրելու իրենց իսկ պատկերազարդ գրքի հնգական նկարազարդում և ներկայացնելու իրենց տեսակետը ընտրության վերաբերյալ:

«Սրա միջոցով ցուցահանդեսն անմիջական կամուրջ է ստեղծում մասնակիցների հետ»,- ասաց Ժ. Գաբրիելյանը: Նա նշեց նաեւ, որ մենք  մեր գրքերում երեխաներին երբևիցե չենք բացատրել, թե ինչպես պետք է լսեն, ուտեն կամ էլ թե` ինչ է նշանակում սիրել, մահանալ: Մեր հեքիաթներում միշտ չարի ու բարու պայքարն է ներկայացվում, որտեղ էլ, բնականաբար, միշտ հաղթում է բարին. «Այս գրքերում մարդ կարող է հանդիպել կյանքի փիլիսոփայությանը»:

Գաբրիելյանը տեղեկացրեց նաև, որ գերմանական սրահն ունի 500 մանուկ ընթերցող: