Վտանգավոր բյուջե

Կառավարությունը ՀՀ տնտեսության իրական պատկերը բացահայտելու փոխարեն ասում է, թե եկեք ավելացնենք բյուջեն: Սակայն այստեղ հարց է առաջանում` ինչի՞ հաշվին է ավելացվում. լրագրողներին այսօր ասաց ՀԱԿ անդամ, տնտեսագետ Վահագն Խաչատրյանը:

Նրա խոսքերով` 101 միլիարդ դրամ հավաքելու համար քաղաքական կամք է անհրաժեշտ, իսկ կառավարությունը ճիշտ ծայրից չի սկսել իր գործունեությունը. առաջին հերթին` պետք էր գնահատել Հայաստանի տնտեսության պոտենցիալը, իսկ բյուջեի եկամուտները 101 միլիարդ դրամով ավելացնելու` կառավարության հավակնությունը իրականում վտանգավոր նախաձեռնություն է:

«Որպես մասնագետ` կարող եմ ասել, որ բյուջեն իր մեջ որեւէ ամբիցիա չի պարունակում: Ցանկություն էլ չկա ցույց տալու, թե մենք ինչ-որ բան ենք ուզում անել: Պարզապես բյուջե են ներկայացրել»,- ասաց նա` հավելելով, որ բյուջեի համալրումը փոքր ու միջին բիզնեսի հաշվին է լինելու, այսինքն` հարկային բեռը դարձյալ սովորական քաղաքացիների վրա է ընկնելու:

«Եթե այս բյուջեն իրականություն դառնա, ապա կլինի հակառակը` այն բացասական ազդեցություն կունենա բիզնեսի վրա»,- շեշտեց տնտեսագետը` նշելով, որ սա վտանգավոր բյուջե է: