Գավառցիների աչքը լույս

«Երկիր»-ի օգոստոսի 23-ի համարում անդրադարձել էինք «Գավառտրանս» ընկերության մեքենայություններին` առ այն, որ ընկերությանը պատկանող «Երեւան-Գավառ-Երեւան» երթուղու մեկ տոմսի արժեքը բարձրացել է 300 դրամով` 700 դրամից հասնելով 1000 դրամի: Ընդ որում՝ ընկերությունը ուղեւորափոխադրման մրցույթը շահել էր 500 դրամով:

Տնտեսական մրցակցության պաշտպանության պետական հանձնաժողովի ուշադրությունից դուրս չմնաց մեր հրապարակումը: Երեկ ՏՄՊՊՀ-ն հրապարակեց «Գավառտրանս»-ի դեմ վարույթի արդյունքները, ըստ որի` «Գավառտրանսն» ունի գերիշխող դիրք, քանի որ Գավառը եւ հարակից գյուղերը սպասարկող միակ երթուղին է: Իր վարքագծով նա խոչընդոտել է առավել բարեխիղճ ընկերությունների մուտքը շուկա, քանի որ մրցութային փաթեթում առաջարկել է անհամեմատ ցածր գին, ինչն էլ մրցույթը շահելու հիմնական պատճառներից մեկն է հանդիսացել»:

Փաստորեն, «Գավառտրանսը» չի կատարել պայմանագրով նախատեսված իր պարտավորությունները եւ սպառողներին առաջարկել է ծառայությունների մատուցման այլ պայմաններ՝ ոտնահարելով նրանց իրավունքները, ինչի համար տուգանվում է 10 մլն դրամով եւ պարտավորվում է 5-օրյա ժամկետում խախտումը վերացնել: