Մեծ Բրիտանիայի պաշտպանության նախարարը հրաժարական է տվել

Մեծ Բրիտանիայի պաշտպանության նախարար Լիամ Ֆոքսը հրաժարականի դիմում է գրել եւ ազատվել իր պաշտոնից: Այսօր այդ մասին պաշտոնական հաղորդագրություն է տարածել Բրիտանիայի պաշտպանության նախարարությունը:

Ըստ Sky news հեռուստաընկերության` նախարարի հրաժարականի պատճառը նրա ընկերոջ` Ադամ Ուերիթիի շուրջ ծագած սկանդալն է: Վերջինս, ոչ մի պաշտոն չզբաղեցնելով, ազատ մուտք է ունեցել նախարարություն եւ  ուղեկցել է նախարարին նրա արտասահմանյան ուղեւորությունների ժամանակ:

Բացահայտվել է, որ Ուերիթին նաեւ կազմակերպել է Ֆոքսի հանդիպումները օտարերկրյա կառավարությունների եւ միջազգային ընկերությունների ներկայացուցիչների հետ, ովքեր շահեր են ունեցել պաշտպանության ոլորտում: Սա կասկած է առաջացրել այն առումով, որ Ուերիթին նյութապես շահագրգռված է` մասնավոր ընկերությունների շահերի լոբբինգ իրականացնելով:

Պարզվել է, որ Ուերիթիի արտասահմանյան ուղեւորությունները ֆինանսավորվել են ոչ միայն պաշտպանության նախարարության, այլեւ մասնավոր ընկերությունների կողմից: