10 տարի ազատազրկում` ծեծելով կնոջը սպանելու համար

Արարատի եւ Վայոց ձորի մարզերի ընդհանուր իրավասության դատարանը` դատավոր Թաթուլ Պողոսյանի նախագահությամբ, այսօր 10 տարվա ազատազրկման է դատապարտել Յանիս Սարկիսովին, որը մոտ մեկ տարի առաջ դաժանաբար ծեծելով սպանել էր կնոջը` 20-ամյա Զարուհի Պետրոսյանին:

Վկաների մեծ մասի խոսքերով` մանկատան սան Զարուհի Պետրոսյանը պարբերաբար ծեծի է ենթարկվել Յանիս Սարկիսովի եւ նրա մոր կողմից, իսկ դեպքի օրը` 2010-ի սեպտեմբերի 30-ին նրան ծեծելով ցած են նետել աստիճաններից, ինչի հետեւանքով կինը «գանգուղեղի հեմատոմա, աջ ձեռքի երկրորդ մատի միջին ֆալանգի փակ կոտրվածք` առանց տեղաշարժի, եւ մարմնի տարբեր շրջանների արյունազեղումներ» ախտորոշմամբ տեղափոխվել էր հիվանդանոց, որտեղ մեկ օր անց մահացել էր:

Յանիս Սարկիսովին ձերբակալել էին եւ մեղադրանք առաջադրել 112 հոդվածի 2-րդ մասի 14-րդ կետի (դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ) հատկանիշներով, իսկ նրա մորը ոչ միայն պատասխանատվության չէին ենթարկել, այլեւ Զարուհու փոքրիկ դստերը հանձնել էին տատի խնամակալությանը:

Սարկիսովը դատավարության ընթացքում չէր ընդունել իր մեղավորությունը, ավելին` սանձարձակ էր իրեն պահել դատարանի դահլիճում: