"Ժառանգության" ախորժակը կրկնապատկվել է

«Ժառանգություն»-ը համագործակցում է եւ լավ հարաբերություններ ունի «Ազատ դեմոկրատների» հետ, լինում են պարբերական հանդիպումներ: Այս մասին լրագրողների հետ հանդիպման ժամանակ հայտնեց «Ժառանգություն» կուսակցության մամուլի խոսնակ Հովսեփ Խուրշուդյանը:

Պատասխանելով ՀԱԿ-ի հետ հավանական համագործակցության մասին yerkir.am-ի հարցին` Խուրշուդյանը նկատեց, թե կուսակցությունը բաց է բոլոր քաղաքական ուժերի հետ համագործակցությանը, անգամ` ամենաանպարկեշտների, եւ շտապեց ավելացնել, որ, անպարկեշտ ասելով, ամենեւին էլ ՀԱԿ-ին նկատի չունի: ՀԱԿ-«Ժառանգություն» հավանական համագործակցությունը կուսակցության մամուլի խոսնակը կուսակցության խորհրդարանական խմբակցության պատգամավորների նման եւս կապեց ժողովրդի պահանջի հետ:

Մեկնաբանելով գնահատականներն այն մասին, թե «Ժառանգությունը» նոր խորհրդարան չի անցնի, Խուրշուդյանը նշեց, որ քաղաքական ուժերին ընտրում է ժողովուրդը, «ոչ թե ծախու սոցիոլոգներն ու քաղաքական տեխնոլոգները»:

Նա վստահեցրեց, որ ակնկալում են կրկնապատկել իրենց տեղերը խորհրդարանում: