Աբորտ անող անչափահասների թիվն ավելացել է

Երբ անցանկալի հղիության դեպքում ստացվում է այնպես, որ երեխան, վերջիվերջո, լույս աշխարհ է գալիս, նրան մինչեւ կյանքի վերջը ավելորդության զգացումն է հետապնդում. լրագրողների հետ հանդիպման ժամանակ ասաց կլինիկական հոգեբան Լիլիթ Երիցյանը:

Նա նշեց նաեւ, որ կնոջն անհրաժեշտ է հոգեբանական օգնություն ինչպես հղիության արհեստական ընդհատումից հետո, այնպես էլ` առաջ:

«Պղտի արհեստական ընդհատման դեպքում կինը մեղքի խորը զգացողություն է ունենում, բայց լինում են դեպքեր, երբ կինը չի էլ հասցնում հասկանալ, թե ինչ կատարվեց իր հետ»,- ասաց հոգեբանը:

Տեր Թովմա քահանա Անդրեասյանն էլ տեղեկացրեց, որ Հայ Առաքելական եկեղեցին, ճիշտ է, դեմ է հղիության արհեստական ընդհատմանը, սակայն կան դեպքեր, երբ դա ընդունելի է, քանի որ Աստված խաղաղություն եւ սեր է. «Օրինակ` երբ վտանգ է սպառնում կնոջ կյանքին, կամ էլ` երբ երեխան բռնաբարության հետեւանք է»:

Մանկաբարձ-գինեկոլոգ Դոնարա Ալագյոզյանն էլ իր խոսքում նշեց, որ կինը հղիության արհեստական ընդհատումից հետո պետք է վերականգնողական շրջան անցնի:

«Ասեմ, որ պտղի արհեստական հեռացումը կարող է քաղցկեղ առաջացնել. միշտ չէ, որ բժշկի միջամտությունից հետո հետագայում բարդություններ  չեն առաջանում, ինչը կախված է նաեւ կնոջից»,- ասաց նա:

Yerkir.am-ի հարցին, թե, արդյոք, ավելացե՞լ է այն անչափահասների թիվը, ովքեր նույնպես հղիության արհեստական ընդհատում են կատարում, Ալագյոզյանը պատասխանեց, որ նրանց թիվը շատացել է. «Սա պայմանավորված է այն բանով, որ անչափահասները սկսել են սեռական ակտիվ կյանք վարել, բայց չունեն նորմալ ինֆորմացիա, թե ինչպես կարելի է գոնե հղիությունից խուսափել»: