Արցախում ինտերնետ-բաժանորդների թիվն ավելացել է

Արցախում ինտերնետ ցանցի բաժանորդների թիվը զգալիորեն ավելացել է. հուլիսի 1-ի դրությամբ բաժանորդների թիվը կազմել է 11524՝ նախորդ տարվա նույն ժամանակահատվածի 7654-ի փոխարեն. այսօր հրավիրած մամուլի ասուլիսի ժամանակ հայտարարել է ԼՂՀ ազգային վիճակագրական ծառայության նախագահ Մանուշ Մինասյանը:

Ըստ նրա` բնակարաններում ինտերնետ ունեցողների թիվը կազմում է 10358՝ նախորդ տարվա նույն ժամանակահատվածի 4053-ի փոխարեն: Աճել է նաեւ բջջային ցանցի ապարատների թիվը՝ կազմելով 82506 հատ /նախորդ տարվա նույն ժամանակահատվածում՝ 68527/, այդ թվում՝ մշտական գծինը` 57272 հատ: Իսկ ահա հիմնական հեռախոսային ապարատների թիվը նվազել է՝ 25554 հատից հասնելով 22061-ի:

«Հանրապետությունում այս տարվա հունվար-հունիսին կապի ծառայություններից ստացված եկամուտների ընդհանուր ծավալը փաստացի գներով կազմել է 3.5 մլրդ դրամ, որն անցած տարվա հունվար-հունիսի նկատմամբ, համադրելի գներով, աճել է 18.6 տոկոսով: Նշված եկամուտներից բնակչությանը մատուցված ծառայությունների բաժինը կազմել 2.5 մլրդ. դրամ»,- տեղեկացրել է վիճակագրական ծառայության նախագահը: