Վան Պերսին` Տևեսի փոխարեն

«Մանչեսթեր Սիթին»  պատրաստվում է հունվարին տրանսֆերի հանել խնդիրներ ստեղծող արգենտինացի խաղացող Կարլոս Տևեսին: Ինչպես հայտնում է The Telegraph-ը, Տևեսը կլքի քաղաքաբնակներին 20 մլն ֆունտի դիմաց:

Հիշեցնենք, որ ամռանը շեյխերը արգենտինացուն 50 մլն էին գնահատում: Բայց, ինչպես երևում է, հարձակվողը հասցրել է զզվեցնել Մանչինիին և թիմի ղեկավարությանը:

Ակումբը Կարլոսին 2 շաբաթով հեռացրել է խաղերից և արգելել մասնակցել պարապմունքներին: Հիշեցնենք, որ Բավարիայի դեմ հանդիպման ժամանակ խաղացողը հրաժարվել է փոխարինման դուրս գալ, թեեւ պնդում է, որ իրեն սխալ են հասկացել:

Եթե «Սիթին» կարողանա ապացուցել, որ Տևեսը հրաժարվել է կատարել աշխատանքային պարտականությունները, ապա պայմանագիրը կարող են չեղյալ համարել: Սակայն «Սիթին» դատարանի դռներն ընկնել չի ուզում և մտադիր է պարզապես վաճառել հարձակվողին: Քաղաքաբնակները ստացված գումարով ցանկանում են ձեռք բերել «Արսենալի» հարձակվող Ռոբին վան Պերսիին: