Թուրքիան հայտարարել է Ռուսաստանի հետ գազային նոր պայմանագրեր կնքելու պատրաստակամության մասին

Թուրքիան մտադիր է մինչև տարեվերջ Ռուսաստանի հետ գազային նոր պայմանագրեր կնքել 3-ից 10 տարի ժամկետով. հայտարարել է հանրապետության էներգետիկայի նախարարության ղեկավար Ֆաթիհ Դյոնմեզը։

«Ռուսաստանի հետ տարեվերջին ավարտվող պայմանագրերը կերկարաձգվեն։ Այս պայմանագրերի ժամկետները նախկինի պես երկար չեն, դրանք կարող են տատանվել 3-ից մինչև 10 տարի: Մենք ակնկալում ենք, որ գործարքը կավարտվի մինչև տարեվերջ։ Կլինի նաև ըստ կարիքների մատակարարումների ավելացման հնարավորություն։ Նախորդ պայմանագրում այս կետը չկար»,- նրան մեջբերում է Anadolu գործակալությունը։

Էներգետիկայի նախարարության ղեկավարը հավելել է նաև, որ Ռուսաստանի հետ սկզբունքային համաձայնություն արդեն ձեռք է բերվել, մինչդեռ գազի գինը նույնն է լինելու ինչպես պետական խողովակաշարի, այնպես էլ մասնավոր մատակարարների համար։

Հոկտեմբերին Թուրքիան և «Գազպրոմը» փորձեցին բանակցել Թուրքիա գազի մատակարարումների ավելացման շուրջ․ 2022 թվականին «Թուրքական հոսք» գազատարը կունենա 9,75 միլիարդ խորանարդ մետր ոչ պայմանագրային հզորություն։

Սեպտեմբերին հայտնի դարձավ, որ Անկարան քննարկում է գազի մատակարարման նոր պայմանագրերի կնքում տարբեր երկրների, այդ թվում՝ Ռուսաստանի հետ։

Օգոստոսին Թուրքիայի նախագահ Թայիփ Էրդողանը հայտարարել էր, որ  ակնկալում են ավելացնել գազի մատակարարումները «Թուրքական հոսք» խողովակաշարով։