Մինչեւ եկեղեցուն ծառայելը, մենք ծառայել ենք Հայոց բանակում

«Նույն տղամարդիկ չե՞ն, ի՞նչ վատ բան կա դրա մեջ»,- ՀՀ անկախության 20-ամյակին նվիրված միջոցառմանը հոգեւորականների` զորահանդեսին մասնակցելու փաստին այսպես արձագանքեց Միքայել եպիսկոպոս Աջապահյանը:

Ըստ Սրբազանի` հասարակության համար սա, իրոք, արտառոց երեւույթ է, բայց այն շարունակական բնույթ է կրելու:

«Մինչեւ եկեղեցուն ծառայելը, նրանք նախ ծառայել են Հայոց բանակում, եւ այժմ նրանց հոգեւորական լինելը որեւէ կերպ չի խանգարում մասնակցել իրենց երկրի անկախությանը նվիրված զորահանդեսին»,- պարզաբանեց եպիսկոպոսը:

Հարցին, թե ի՞նչ է տվել Հայ Առաքելական եկեղեցուն մեր 20-ամյա անկախությունը, Սրբազան հայրը պատասխանեց. «Դարեր շարունակ եկեղեցին պայքարել է մեր անկախության համար եւ եղել է մեր ինքնության դրոշակակիրը, մի հաստատություն, որ ծանր ժամանակներում վառ է պահել անկախ պետականության լույսը»,- ասաց Սրբազանը` հավելելով, որ անկախությունն արդեն իսկ եկեղեցու համար մեծ ձեռքբերում է: