Բելառուսի ընդդիմադիր կուսակցության ղեկավարը ձերբակալվել է

Մոսկովյան «Դոմոդեդովո» օդանավակայանում երկուշաբթի օրը ձերբակալվել է Բելառուսի Միասնական քաղաքացիական կուսակցության առաջնորդ Անատոլի Լեբեդկոն: Այս մասին «Ինտերֆաքս»-ին ասել է «Պրավոյե դելո» կուսակցության նախկին ղեկավար Լեոնիդ Գոզմանը. «Նա հենց ինքն ինձ զանգահարեց եւ ասաց, որ օդանավակայանի սահմանապահ ծառայությունը ձերբակալել է իրեն` առանց որեւէ պատճառաբանության: Մանրամասներ իմանալ չի հաջողվում: Լեբեդկոն չի պատասխանում զանգերին»:

Այս տեղեկության վերաբերյալ դեռեւս պաշտոնական մեկնաբանություն չկա: Անհասկանալի է, թե ինչպես կարող էր Լեբեդկոն հանդիպում ունենալ արտերկրում, եթե անձնագիր չուներ:

Նշենք, որ դեկտեմբերին նա մի շարք ընդդիմադիրների հետ նախագահական ընտրություններից հետո կազմակերպված ընդվզման ակցիաների ժամանակ ձերբակալվել էր, նրա դեմ հարուցվել էր քրեական գործ, որը կարճվել էր օգոստոսի վերջին: