Ասիական մոդելներն այսօր ավելի մեծ պահանջարկ ունեն

Գեղեցիկի ընկալումը, կարելի է ասել, ձեւավորվում է նույնիսկ հղիության ընթացքում: Մարդն ի ծնե շփման մեջ է գեղեցիկի հետ. Գեղեցկության միջազգային օրվա կապակցությամբ հրավիրված ասուլիսի ժամանակ ասաց հոգեբանական գիտությունների դոկտոր Սամվել Խուդոյանը:

Նրա խոսքերով` գեղեցիկն առանձնահատուկ է իր ընկալման չափանիշներով, եւ այն հեշտ կամ ճիշտ ընկալելու խնդիր չունի, բոլորն էլ նկատում են գեղեցիկը, սակայն այն ունի անհատական մոտեցում, ինչպես, օրինակ, երաժշտությունը կամ նկարչությունը:

1995 թվականից սեպտեմբերի 9-ը միջազգայնորեն նշվում է որպես գեղեցկության տոն:  Տոնի նախաձեռնությունը պատկանում է Էսթետիկայի եւ կոսմետոլոգիայի միջազգային կոմիտեին` ՍԻԴԵՍԿՕ-ին:

Ասուլիսի ընթացքում խոսվեց ժամանակակից ԶԼՄ-ների կողմից մարդկանց մոտ գեղեցկության նոր չափանիշներ ձեւավորելու եւ դրա վտանգների, Հայաստանում մոդելային բիզնեսի եւ համաշխարհային գեղեցկության մրցույթներում Հայաստանի հաղթանակների մասին:

«Հոկտեմբերին տեղի ունենալիք գեղեցկության մրցույթի համար արդեն 100-ից ավելի հայտեր ենք ընդունել: Նրանցից ընտրվելու են 20-24 հոգի: Կարելի է ասել, որ ասիական մոդելներն այսօր ավելի մեծ պահանջարկ ունեն»,- նշեց «Միսս Հայաստան» ազգային գործակալության գործադիր տնօրեն եւ կազմկոմիտեի պատասխանատու Մամիկոն Դանիելյանը:

Ըստ նրա` Հայաստանում մոդելային բիզնեսը դեռեւս հստակ ձեւավորված չէ: