ԺԱՄԱՆԱԿ. Բուլկին ու Գազի Կարենը զվարճանքի նոր կենտրոն կկառուցեն

Տիգրան Մեծի 4 հասցեում` «Երեւան» կինոթատրոնի հարեւանությամբ, եւ գրեթե հրապարակում գտնվող Պետական գույքի կառավարման վարչության ու «Հայարդնախագիծ ինստիտուտ» ԲԲԸ-ի շենքի նկուղային հարկում զվարճանքի կենտրոն է կառուցվելու:

«Ժամանակ»-ի տեղեկություններով` այդ շենքի որոշ մասը պատկանում է բնապահպանության նախարար Արամ Հարությունյանին, եւ վերջինս նեղ շրջանակում հայտարարել է, որ շենքի նկուղային հատվածում զվարճանքի կենտրոն կառուցելու համար ստացել է Կարեն Կարապետյանի «դաբրոն»:

Նախատեսվում է, որ համալիրն ունենալու է սաունա, բիլիարդ, առանձնասենյակներ, ինչպես նաեւ չորս մուտք:

Հիշեցնենք, որ մինչ բնապահպանության նախարար լինելը, Արամ Հարությունյանը զբաղեցնում էր քաղաքաշինության նախարարի պաշտոնը, իսկ «Հայարդնախագիծ ինստիտուտը» թեեւ անմիջականորեն չի ենթարկվում քաղաքաշինության նախարարությանը, սակայն որոշակի կապ կա: 2006թ. նույն շենքի տանիքին վեցերորդ հարկի կառուցման աշխատանքներն էին տարվում, եւ այն ժամանակ քաղաքաշինության նախարարն էր հենց Արամ Հարությունյանը: