Թուրքիան սպառնում է Կիպրոսին

Անկարան անթաքույց սպառնալիքներ է տեղացել Կիպրոսի հասցեին, քանի որ վերջինս պատրաստվում է հոկտեմբերին գազի հանքավայրի հետախուզություն կատարել Միջերկրական ծովի շելֆի իր հատվածում:

Կիպրական թերթերը մեջբերում են ԵՄ անդամակցության գործերով Թուրքիայի պետնախարար Էղեմեն Բաղըշի խոսքերը, որը չի բացառել ռազմական ուժի կիրառումը` հետախուզական աշխատանքները կանխելու համար: Թուրքիան պնդում է, որ դա դեմ է Թուրքիայի եւ թուրք կիպրացիների շահերին, քանի որ նրանք չեն կարողանա օգտվել հանքավայրի շահագործումից ստացվելիք տնտեսական շահույթից. տեղեկացնում է ИТАР-ТАСС-ը:

Իր հերթին, Կիպրոսի կառավարության պաշտոնական ներկայացուցիչ Ստեֆանոս Ստեֆանուն հայտարարել է, որ Թուրքիայի սպառնալիքներն «անընդունելի են եւ սադրիչ»:

«Կառավարությունը հայտնում է իր դժգոհությունը թուրք պաշտոնական անձանց կողմից Կիպրոսի Հանրապետության եւ նրա ինքնիշխան իրավունքների դեմ շարունակվող սադրիչ հայտարարությունների կապակցությամբ: Նման վերաբերմունքն անընդունելի է եւ արժանի դատապարտման: Այն ցույց է տալիս, որ Թուրքիան նախկինի պես խախտում է ՄԱԿ-ի կանոնակարգը եւ միջազգային իրավունքը` բացահայտորեն սադրելով Կիպրոսի Հանրապետությանը, որը ՄԱԿ-ի եւ ԵՄ անդամ է, եւ շարունակում է 1974 թվականից զենքի միջոցով ոստնահարել նրա անկախությունը, ինքնիշխանությունը եւ տարածքային ամբողջականությունը»,- հայտարարել է կիպրոսցի պաշտոնյան:

Նա նաեւ կոչ է արել միջազգային հանրությանը, առաջին հերթին` ԵՄ-ին` վճռական քայլեր կիրառել Թուրքիայի նկատմամբ եւ կանխել հնարավոր ճգնաժամը, որ Թուրքիան փորձում է ստեղծել Միջերկրական ծովում: