Black Sabbath-ը չի վերամիավորվի

Black Sabbath-ի կիթառահար Թոնի Այոմին հերքել է այն տեղեկությունը, թե խմբի անդամները վերամիավորվելու են:

Ինչպես հաղորդում է Reuters-ը, օրեր առաջ The Birmingham Mail-ը հաղորդել էր, թե Այոմին, վոկալիստ Օզի Օզբորնը, բաս-կիթառահար Գիզեր Բաթլերը եւ հարվածային գործիքներ նվագող Բիլ Ուրդը սկսել են համերգային շրջագայության պատրաստվել: Նույնիսկ նշվում էր, թե այս շրջագայությունը կապված է հաջորդ տարի նոր ալբոմ թողարկելու հետ:

«Լրագրողն օգտագործել է դեռեւս հունիսին տեղի ունեցած մեր զրույցը եւ այնպես է ներկայացրել, թե կարծես մենք երեկ ենք խոսել Black Sabbath-ի վերամիավորվելու մասին: ... Այդ ժամանակ ես անկապ բաներ եմ ասել` բարձր մտածելով այն մասին, ինչն անընդհատ հարցնում են` վերամիավորվելո՞ւ եք»,- ասել է Այոմին:

Այդ հրապարակման մեջ նշվում է, թե իբր Այոմին անհամբերությամբ է սպասում շրջագայության մեկնարկին: Այնինչ` նա իր պաշտոնական կայքում «կատարյալ անհեթեթություն» է անվանել դա եւ ներողություն խնդրել խմբի մյուս երեք անդամներից. «Շնորհակալություն ինտերնետին, որի շնորհիվ այդ ինֆորմացիան տարածվել է` որպես իմ «պաշտոնական» հայտարարություն»: