Թուրքական հիստերիայի հերթական դրսեւորումը

Իգդիրում գործող «Հայկական անհիմն մեղադրանքների դեմ պայքարի միությունը» այստեղ բողոքի ակցիա է կազմակերպել` ընդդեմ Հայաստանի նախագահ Սերժ Սարգսյանի` Արեւմտյան Հայաստանի եւ Արարատի մասին արած հայտնի հայտարարության:

Ինչպես տեղեկացնում է թուրքական haber3 կայքը, հիմնականում ադրբեջանցիներով բնակեցված Իգդիրում այրել են Հայաստանի նախագահի նկարները եւ մեղադրել նրան` երիտասարդ սերնդի մեջ «հարեւան երկրի հողերի հանդեպ» տարածքային պահանջներ եւ թշնամանք սերմանելու մեջ:
Ավելին, հայ-թուրքական սահմանի մոտ հավաքված ամբոխը նաեւ նման հայտարարություն է արել.«Հայկական սահմանի մոտ նրանց մարտահրավեր ենք նետում: Եթե այդքան ուժեղ եք, ապա Արարատն էլ այստեղ է, մենք էլ, եկե'ք, վերցրե'ք»:

Երեւի թուրք եւ ադրբեջանցի ջահելներին պետք է հիշեցնել, որ պարբերաբար ռազմատենչ հայտարարություններ անողն ու թշնամանք սերմանողները հենց իրենց պաշտոնյաներն են:

Հիշեցնենք, որ հայկական կողմը թուրք պաշտոնյաների կողմից հնչեցվող մեղադրանքներին պատասխան գրեթե չի տվել: Միայն փոխարտգործնախարար Շավարշ Քոչարյանն էր նշել, որ թուրքերը հավանաբար նախագահի խոսքի ամբողջական տարբերակը չեն կարդացել եւ կառչում են միայն խոսքի ինչ -որ հատվածներից, իսկ ՀԿ մամուլի խոսնակ Էդուարդ Շարմազանովն ասել էր.«Համոզված եմ, որ ոչ մի հայ երիտասարդի համար Արարատ լեռը երբեք Ագրիդաղ չի դառնա, ինչպես որ երբեք Արեւմտյան Հայաստանը չի դառնալ Արեւելյան Անատոլիա»: