Դատել են "գործիքին"

Դատել են ընդամենը ձգան քաշողին, այսինքն` «գործիքին»: «Բնականաբար, մենք պետք է շարունակենք պահանջել, որ հարցաքննությունը շարունակվի, եւ փորձեն պարզել, թե ով էր պատվիրատուն»,- ասաց թուրքագետ Արտակ Շաքարյանը` անդրադառնալով Հրանտ Դինքին սպանողին 23 տարվա ազատազրկման դատապարտելուն: Նա նշեց, որ ինքը ողջունում է այդ որոշումը, բայց դեռեւս լուծում չստացած շատ հարցեր կան:

Հիմնական խնդիրներից թուրքագետն առանձնացրեց այն հարցը, թե ինչպես են այդ ամենը ներկայացրել թուրքական լրատվամիջոցները: Օրինակ` «Անադոլու» պետական գործակալությունը գրել է. «Երեխա Օգյուն Սամասթին դատապարտել են 23 տարով»: Թուրքագետի խոսքերով` այս կերպ փորձ է արվում ազդել հասարակության վրա:

Մյուս էական հարցն այն է, որ եթե դա չիրագործվի, գոնե պետք է պատժվեն մյուս մեղավորները, օրինակ` այն ոստիկանները, որոնք տեղյակ են եղել սպանության կազմակերպման մասին, բայց քայլեր չեն ձեռնարկել: