Ծեծկռտուք` Սիրիայի պատճառով

Հարեւան Սիրիայում տիրող իրադրության վերաբերյալ հայտարարությունը քննարկելու ժամանակ Լիբանանի խորհրդարանում ծեծկռտուք է եղել:

Սիրիայի պետական հեռուստաընկերությունը մեկ օր առաջ ցուցադրել էր «ահաբեկիչների», որոնք խոստովանում են, թե լիբանանյան Future Movement բլոկից զենք ու գումարներ են ստացել:

Future Movement-ից պատգամավոր Հալեդ Դահերը բոցաշունչ ելույթ է ունեցել` գովաբանելով Ասադի բռնատիրության դեմ պայքարող սիրիացի ցուցարարներին: Նրա ելույթն ընդհատել է «Բաաս» կուսակցության լիբանանյան թեւից պատգամավոր Ասեմ Քվանսոն` բացականչելով. «Դու ամոթալի շուն ես»:

Արաբին շուն անվանելը սարսափելի վիրավորանք է: Դահերը բռունցքներով հարձակվել է իրեն վիրավորողի վրա` նրան նույնպես շուն անվանելով:

Ծեծկռտուքին միջամտել է ամբողջ խորհրդարանը: Սիրիայի հարցով հայտարարություն այդպես էլ չի ընդունվել: