Ուիմբլդոն 2011. տղամարդկանց պայքար

Լոնդոնում կայացավ Ուիմբլդոն 2011-ի քառորդ եզրափակիչը: Այս փուլը ևս զերծ չմնաց անակնկալներից: Տղամարդկանց պայքարում  աշխարհի 3-րդ ուժեղագույն թենիսիստ, 29-ամյա շվեյցարացի Ռոջեր Ֆեդերերը պարտվեց  26-ամյա ֆրանսիացի Ժո-Վիլֆրիդ Ցոնգային։ Հինգ սեթերի արդյունքում` 6։3, 7։6(3),4:6, 4:6, 4:6 հաշվով, առաջին անգամ քառորդ եզրափակիչում հայտնված թենիսիստը պայքարից դուրս թողեց այս մրցաշարի վեցակի չեմպիոնին: Հանդիպումը տևել է 3 ժամ 8 րոպե։
 
1/2  դուրս գալու համար Ցոնգան կմրցի  սերբ Նովակ Ջոկովիչի հետ, ով 6:2, 3:6, 6:3, 7:5 հաշվով առավելության է հասել 19-ամյա ավստրալացի Բերնարդ Տոմիչի նկատմամբ։
 
Ուիմբլդոնի գործող չեմպիոն,  իսպանացի Ռաֆայել Նադալն արդարացրեց սպասելիքները: Ամերիկացի Մարդի Ֆիշի հետ պայքարում Նադալը հաղթեց չորս սեթերում` 6։3, 6։3, 5։7, 6։4 հաշվով։ Հանդիպումը տևել է 2 ժամ 50 րոպե։
 
Կիսաեզրափակիչում Ռաֆան ուժերը կչափի աշխարհի 4-րդ ուժեղագույն թենիսիստ բրիտանացի Էնդի Մարեյի հետ, ով 6։3, 6։4, 6։4 հաշվով պայքարից դուրս թողեց Ֆելիսիանո Լոպեսին։

Հայտնի են կիսաեզրափակիչի զույգերը: Մեր կանխատեսումներում սխալվել էինք միայն Ֆեդերերի հարցում: Մրցաշրջանի սկզբում՝ Ռոլան Գարոսում, հողածածկի վրա Ռոջերը պայքարից դուրս թողեց աշխարհի 2-րդ ուժեղագույն թենիսիստ Ջոկովիչին, նվեր անելով Նադալին, ում բախտը չի բերում Նովակի հետ մրցելույթներում: Իսկ այժմ նա սխալվում է: Այսպիսով, Ցոնգան, ումից ոչ ոք նման արդյունք չէր ակնկալում, կիսաեզրափակիչում է:
 
Անի ՄԵՋԼՈՒՄՅԱՆ