Վիրտուալ սեքսը` հյուրանոցային ստանդարտ ծառայություն

Travelodge հյուրանոցային ցանցը հրապարակել է հետազոտության արդյունքներ, որի թեման հյուրանոցային բիզնեսի ապագան է եւ ստանդարտ հյուրանոցի բնութագիրը 2030-ին:

Խնդրի իրականացման համար Travelodge-ը վարձել էր ինժեներ եւ ֆուտուրոլոգ Յան Պիրսոնին, որն իր զեկույցը վերնագրել է «Քնի ապագան» (The Future of Sleep): Հետազոտողը հավաստիացնում է, որ ապագայում տեխնոլոգիաները հնարավորություն կտան վերահսկելու հյուրանոցների հյուրերի քունը, առողջությունը, տրամադրությունը: Ըստ նրա` հյուրերը կկարողանան քնած ժամանակ լեզուներ սովորել, ֆիզիկա ու մաթեմատիկա ուսումնասիրել:

Զեկույցում ասվում է. «Ձայները, պատկերները եւ այլ զգայական զգացողությունները կարտադրվեն մեր մահճակալի կամ անկողնու միջոցով, ինչը մեր քունը կդարձնի շատ իրական: Մենք կարող ենք մեր հավանած երազը նայել այնքան անգամ, որքան կամենանք, ինչպես նայում ենք սիրված ֆիլմը: Մեր երազներին կարող են մասնակցել մեր զուգընկերներն ու ընկերները, եւ մենք կկարողանանք հաճույք ստանալ համատեղ քնից: Հեռավոր զուգընկերոջ հետ վիրտուալ սեքսը սովորական բան կդառնա, ինչպես նաեւ` նրա արտաքինի փոփոխությունը»:

Պիրսոնի խոսքերով` իր նկարագրած տեխնիկական հրաշքների մեծ մասը 2030 թվականին տնտեսապես հասանելի կդառնա, եւ դրանից կկարողանան օգտվել նույնիսկ ամենահամեստ հյուրանոցի այցելուները: