Իրավիճակը ստիպում է ոչ ստանդարտ քայլերի դիմել

Ազատության հրապարակում անժամկետ հացադուլ հայտարարած Րաֆֆի Հովաննիսյանը քիչ առաջ ասել է, որ շարունակելու է հացադուլն այնքան ժամանակ, որքան Աստված իրեն ուժ տա:

«Ճանապարհը մեկն է` ժողովրդի իշխանության գալը: Նժարի վրա է դրված Հայաստանի անվտանգությունը եւ ազգային շահը: Այս հարցերը բարձրացված են եւ պատասխաններն անպայման ստանալու ենք»,- նշել է նա եւ հավելել, որ այս յոթ օրերի ընթացքում հետաքրքիր մի հանգամանքի է առնչվել` հասարակական գիտակցության փոփոխության:

«Այսինքն` առկա են իրավադիրության կամքի ոգու նոր ծիլեր, որոնք, սակայն, բավարար չեն: Չնայած գիտակցում եմ, որ Աստված մեզ մեկ անգամ է կյանք տվել, որը պետք է արժեւորել, սակայն քաղաքական ներկայիս իրավիճակը ստիպում է ոչ ստանդարտ քայլերի դիմել»,- հայտարարել է «Ժառանգության» առաջնորդը:

Նրա հայտարարությունից հետո նույն կուսակցության ԱԺ պատգամավորները ոչ մի մեկնաբանություն չեն արել: