Բենզինը թանկացել է 25 տոկոսով

Համեմատած ապրիլի հետ` մայիսին ոչ պարենային ապրանքների շուկայում գրանցվել է 0.5 տոկոս գնաճ, որը հիմնականում պայմանավորվել է բենզինի եւ դիզելային վառելիքի` համապատասխանաբար 5.2% եւ 4.2% գնաճով:

Իսկ հինգ ամսվա կտրվածքով այս ապրանքատեսակների գինը բարձրացրել է 21.1 եւ 24.9 տոկոսով: Համեմատած նախորդ տարվա մայիս ամսվա հետ` բենզինի եւ դիզելային վառելիքի գներն աճել են, համապատասխանաբար, 13.7% եւ 21.6%-ով:

Գրանցվել է նաեւ գորգերի,  հագուստի, շինանյութի,  կենցաղային էլեկտրաապրանքների,  կոշկեղենի,  կահույքի,  ոսկերչական եւ այլ  ապրանքների թանկացում:

Գնանկում արձանագրվել է մշակույթի,  գեղահարդարման ապրանքների,  գրենական պիտույքների,  լվացող միջոցների, դեղամիջոցների դեպքում:

Դիտարկված 9  քաղաքներում 2011թ.  մայիսին, ապրիլի համեմատ, արձանագրվել է ոչ պարենային ապրանքների 0.1-2.3%  գնաճ,  գնաճի ամենաբարձր ցուցանիշը գրանցվել է Դիլիջանում:

Մայրաքաղաքում ոչ պարենային ապրանքների գներն աճել են 0.4%-ով,  իսկ Գյումրի և Վաղարշապատ քաղաքներում պահպանվել է գների նախորդ ամսվա մակարդակը: