Ամենավաճառվող որոշ դեղերի 30 տոկոսի գինը նվազել է 30 տոկոսով, 6 տոկոսինը թանկացել է 3 տոկոսով

Այսօր կառավարության նիստում առողջապահության նախարար Արմեն Մուրադյանը ներկայացրեց նախարարության կողմից դեղորայքի շուկայում կատարված մշտադիտարկման արդյունքները: Նա նշեց, որ սեպտեմբեր ամսվա ընթացքում մշտադիտարկել են չորս խոշոր ներկրողների` ըստ գնացուցակների ու ներմուծման ծավալների: Մարզերում և Երևան քաղաքում արդյունքները հետևյալն են` 60 տոկոս դեղորայքի գինը մնացել է անփոփոխ, 34 տոկոսինը նվազել է 30 տոկոսով, 6 տոկոսը թանկացել է 3 տոկոսով, ինչը կապված է սեզոնային վաճառքների հետ:

«Մենք ամեն ամսվա 5-ին փոփոխելու ենք այս տվյալներ և ներկայացնելու ենք»,- ասաց նախարարը:

Վարչապետ Հովիկ Աբրահամյանը հավելեց, որ դրա մասին պարբերաբար պետք է ներկայացնել հանրությանը: Վարչապետը թերություն համարեց տեղեկատվության պակասը:  «Բազմաթիվ առիթներով մեզ նամակներ են գրում, որ դեղերը թանկացել են անհիմն, հիմա ուսումնասիրության արդյունքում պարզվել է, որ ոչ միայն նման խնդիր չկա, այլև կա գների նվազեցում: Բայց դրա մասին պետք է խոսվի, դրա մասին  պետք է ասվի հանրությանը: Խնդրում եմ բոլոր իմ գործընկերներին` այդ հարցում լինել ուշադիր»,- ասաց նա: