Հակաիսրայելական ցույցեր` Ստամբուլում

Թուրքիայի կառավարությունը քննարկում է Իսրայելից իր դեսպանին հետ կանչելու հարցը:

Իսկ մինչ այդ Ստամբուլում անցկացվում են հակաիսրայելական ցույցեր անցյալ տարի այս օրը Գազայի հատված նավարկող «Խաղաղության նավատորմիղի»  թուրքական «Մավի Մարմարա» նավի վրա իսրայելական ուժերի հարձակման տարելիցի կապակցությամբ: Հիշեցնենք, որ հարձակման հետեւանքով սպանվել էր 9 թուրք:

Հանրահավաքին մասնակցել է մոտ 30 հազար մարդ: Ցուցարարները մոմեր են վառել եւ թափահարել պաղեստինյան դրոշներ: Հանրահավաքի կազմակերպիչ IHH իսլամական կազմակերպությունը հայտարարել է, որ հունիսի վերջին նոր նավատորմիղ են ուղարկելու Գազայի հատված:

Իսկ երեկ Թուրքիայի արտգործնախարար Ահմեդ Դավութօղլուն Reuters-ին տված հարցազրույցում հայտարարել է, որ ժողովրդավար կառավարությունները չեն կարող խոչընդոտել իրենց քաղաքացիների նման նախաձեռնությանը: Դա պատասխան էր ՄԱԿ-ի գլխավոր քարտուղար Պան Գի Մունի` միջերկրածովյան պետությունների կառավարություններին ուղղված կոչին` խոչընդոտել նոր նավատորմիղների կազմավորմանը: