Բողոքի հուժկու ցույցեր` Իտալիայում

Երեկ տասնյակ ուսանողներ են վիրավորվել Հռոմում ոստիկանության և կրթության պետական փոփոխության դեմ բողոքող ուսանողության միջև տեղի ունեցած բախման ժամանակ, տեղեկացնում է Associated Press-ը:

Չնայած իրավապահ մարմինների ստորաբաժանումների ուժեղացանը, ցուցարարների մի մեծ խմբի հաջողվել է մոտենալ Իտալիայի Սենատին:

Ուսանողները փորձել են շենք ներխուժել, սակայն նրանց ճանապահրը փակել են զինված կարաբիներները, ետ մղել երիտասարդների գրոհը:

Դրանից հետո մի քանի հարյուր ցուցարարներ շարժվել են Իտալիայի վարչապետ Սիլվիո Բերլուսկոնիի նստավայր: Այստեղ էլ նրանց սպասել են ոստիկանական ստորաբաժանումներն ու կարաբիներները: Այստեղ, բարեբախտաբար, միջադեպեր չեն եղել:

Ոստիկանության հետ մեծ ընդհարում է եղել Հռոմի Սան-Մարչելո փողոցում: Ուսանողները ձվեր են նետել ոստիկանների վրա, իրավապահները դրան պատասխանել են ռետինե մահակներով:

Ցուցարարների տվյալներով, վիրավորվել է ավելի քան 10 մարդ: Իշխանություններն ասում են՝ վիրավորվել է 8 կարաբիներ:

Կրթության ոլորտում պետական ֆինանսավորման կրճատման փաստաթուղթը մեծ դժգոհություն է առաջացրել Իտալիայում: Մեկ շաբաթ առաջ ուսանողների բողոքի ցույցեր են տեղի ունեցել երկրի 100 քաղաքներում: Ուսանողների պահանջները պաշտպանում են նաև երկրի ընդդիմադիր կուսակցությունների ներկայացուցիչները:

Ուսանողները պատրաստվում են զանգվածային նոր միջոցառումներ անցկացնել: Նոյեմբերի 27-ին արհմիությունների հետ նրանք պատրաստվում են բողոքի համազգային ցույցի: