Չարամտորեն խուսափել է հարկեր վճարելուց

ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ «Էրկագա Աստղ» ՍՊԸ-ի տնօրեն Ա. Պետրոսյանի կողմից յուրացում կատարելու եւ հարկերը վճարելուց չարամտորեն խուսափելու փաստի առթիվ:

ՍՊԸ-ի տնօրենը Գեղարքունիքի մարզի առաջին ատյանի դատարանի Վարդենիս քաղաքի նստավայրի շենքի վերակառուցման` պետական գնման պայմանագրով նախատեսված աշխատանքները չի իրականացրել: Պետական բյուջեից որպես կանխավճար ստացած 39 165,7 հազար դրամ գումարը նա օգտագործել է իր անձնական կարիքների համար:

Բացի այդ` Ա. Պետրոսյանը ՀՀ ԿԱ ՊԵԿ Արմավիրի տարածքային հարկային տեսչությանը ներկայացրած հաշվարկներում ԱԱՀ-ի հարկման հիմք հանդիսացող տվյալներ չներառելու, շրջանառությունը թաքցնելու միջոցով խուսափել է 33 231 600 դրամի առանձնապես խոշոր չափի հարկերը պետական բյուջե վճարելուց:

ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ` ՀՀ քրեական օրենսգրքի 179-րդ հոդվածի 3-րդ մասի 1-ին կետով եւ 205-րդ հոդվածի 2-րդ մասով. տեղեկացնում է ՀՀ դատախազության հանրային կապերի վարչությունը: