Էդվարդ Նալբանդյանը մի շարք հանդիպումներ է ունեցել Վաշինգտոնում

Մայիսի 19-ին նախարար Նալբանդյանն այցելել է ԱՄՆ Կոնգրես, ուր հանդիպում է ունեցել Ներկայացուցիչների պալատի անդամ, Կոնգրեսի՝ հայկական հարցերով հանձնախմբի համանախագահ, կոնգրեսական Ֆրենկ Փալոնի հետ:

Հայաստանի արտգործնախարարը, շնորհակալություն հայտնելով կոնգրեսականին իր բազմամյա հայանպաստ գործունեության համար, կարեւորել է Ներկայացուցիչների պալատի հայկական հանձնախմբի եւ նրա ղեկավարների մեծ ներդրումն ու դերակատարությունը հայ-ամերիկյան հարաբերությունների ամրապնդման եւ զարգացման գործում:

Կոնգրեսականը ներկայացրել է հայկական հարցերով հանձնախմբի աշխատանքները եւ առաջիկա ծրագրերը, նաեւ նշել, որ ինքը հայ ժողովրդի բարեկամն է եւ շարունակելու է իր գործունեությունը ի նպաստ հայ-ամերիկյան հարաբերությունների ամրապնդման:

Ֆրենկ Փալոնի խնդրանքով նախարար Նալբանդյանը ներկայացրել է Արցախյան հիմնախնդրի կարգավորման բանակցությունների վերջին զարգացումները:

Նույն օրը Էդվարդ Նալբանդյանը հանդիպում է ունեցել նաեւ ԱՄՆ պետքարտուղարի եվրոպական եւ եվրասիական հարցերով տեղակալ Ֆիլիպ Գորդոնի հետ, որի հետ քննարկել է երկկողմ, տարածաշրջանային եւ միջազգային հարցերի լայն շրջանակ:

Իսկ ԵԱՀԿ Մինսկի խմբի համանախագահ Ռոբերտ Բրադկեի հետ արտգործնախարարը քննարկել է առաջիկայում ՄԽ համանախագահների տարածաշրջան այցելությանն առնչվող հարցեր:

Մայիսի 19-ին Էդվարդ Նալբանդյանը Հայաստանի արտաքին քաղաքականության վերաբերյալ ծավալուն ելույթով հանդես եկավ Վաշինգտոնի «Բրուքինգս» քաղաքագիտական կենտրոնում: Նա ներկայացրել է հայ-ամերիկյան հարաբերությունները, մանրամասն անդրադարձել Ղարաբաղյան հիմնախնդրի կարգավորման գործընթացի վերջին զարգացումներին, տարածաշրջանային եւ միջազգային խնդիրների վերաբերյալ Հայաստանի մոտեցումներին, պատասխանել է ներկաների բազմաթիվ հարցերին:

Վաշինգտոնից մեկնելուց առաջ Էդվարդ Նալբանդյանը առանձին հանդիպումներ է ունեցել Ամերիկայի հայկական համագումարի եւ Հայ դատի հանձնախմբի պատասխանատուների հետ, որոնց հետ քննարկել է Հայաստանի արտաքին քաղաքականության, ինչպես նաեւ նրանց գործունեությանն առնչվող հարցեր: