Իրաքցի իշուկը` ԱՄՆ քաղաքացի

37 օր է պահանջվել, որ դեռեւս 3 տարի առաջ ամերիկյան ծովային հետեւակայինների թալիսմանը դարձած իրաքյան` Դըմ անունով իշուկը ԱՄՆ տեղափոխվի:

Զինծառայողներն ու իշուկը ընկերացել էին, երբ վերջինս զինծառայողներից մեկից ծխախոտ էր «թռցրել» ու կերել:

Երբ 2009-ին ամերիկացիները լքել են Իրաքը, իրենց չորքոտանի ընկերոջ մասին հոգ տանելը հանձնարարել են տեղական ցեղերից մեկի շեյխին: Սակայն արդեն պաշտոնաթող գնդապետ Ջոն Ֆոլսոմը չի կարողացել մոռանալ իշուկին եւ որոշել է նրան ԱՄն տեղափոխել: Իհարկե, պարզվել է, որ դա այնքան էլ հեշտ չէ: Նախ` շեյխը հայտնի իշուկի համար 30 հազար դոլար է պահանջել, հետո համաձայնել է ավելի քիչ գումարին: Երկրորդ` Ֆոլսոմը ստիպված է եղել հաղթահարել բյուրոկրատական բազմաթիվ խոչընդոտներ. հարկ է եղել փաստաթղթեր ներկայացել անասնաբույժներից, գյուղատնտեսության նախարարությունից, մաքսային ծառայությունից եւ ավիաընկերություններից:

Ապրիլի 5-ից սկսված ճանապարհորդությունը բավական թանկ է նստել` 30-40 հազար դոլար: Սակայն Ֆոլսոմի կարծիքով` իշուկն արժանի է դրան: «Հիմա նա ամերիկացի իշուկ է»,- ասում է նա: